O subsidio de 426 euros chega a 400.000 parados, un 33% menos do previsto

O ministro de Traballo, Celestino Corbacho, adiantou onte que unhas 400.000 persoas, unhas 200.000 menos das inicialmente previstas (un 33%), beneficiáronse ata agora da axuda de 426 euros para os desempregados que perderon o subsidio. Corbacho subliñou que o programa funciona «adecuadamente» e destacou que un importante número de beneficiarios saíu deste antes da súa finalización ao atopar traballo.
O ministro recordou que o Goberno prorrogou seis meses, ata o 15 de agosto, o programa temporal de protección por desemprego, que inclúe esta axuda de 426 euros. Este programa afecta a desempregados menores de 65 anos que extingan a súa prestación.